Ministrja e Financave, Hykmete Bajrami, ka njoftuar se është duke i trajtuar kërkesat për pagesa në kuadër të ndihmës për biznese dhe punëtorë, në kudër të Pakos Emergjente.

Ajo përmes një postimi në Facebook ka shkruar se është duke u vazhduar zbatimi i masave për ndihmë bizneseve dhe punëtorëve.

”Bazuar në përfundimin e procedurave vlerësuese të Komisioneve përkatëse dhe aprovimeve të aplikacioneve, Ministria e Financave nga data 12.06.2020 deri më datën 17.06.2020 ka ekzekutuar pagesa për rreth 10,668 qytetarë. Pagesat janë ekzekutuar për masa 3 (mbulimi i shpenzimeve të pagave mujore të punëtorëve në shumë prej 170 euro); masa 7 (shtesa për punëtorët e dyqaneve ushqimore, furrave, dhe barnatoreve në shumë prej 100 euro); masën 8 (pagesa e punëtorëve të cilët kanë humbur vendin e punës për shkak të situatës së emergjencës së shëndetit publik në vlerë prej 130 euro) dhe masën 14 (pagesë prej 130€ për punëtorin e regjistruar për dy muajt pasues për shoqëritë tregtare që regjistrojnë punëtorët me kontratë pune së paku 1 vjeçare gjatë situatës së pandemisë)”, ka shkruar ajo.

Po ashtu, Bajrami thotë se, Ministria e Financave është në proces të trajtimit edhe të kërkesave tjera për pagesa, në koordinim midis komisioneve përkatëse dhe ministrive të linjës përgjegjëse, derisa shton se edhe këto pagesa së shpejti do të realizohen.

“Krahas listës prej 2629 përfituesve të aprovuar pardje, sot nga Komisioni është aprovuar edhe lista tjetër prej 985 përfituesve për masën 3b ku sipas Planit Operacional, këta persona do të përfitojnë 50% të Qirasë Bruto. Kjo pagesë do të aprovohet së shpejti dhe masa menjëherë do të ekzekutohet nga Ministria e Financave”, ka shtuar ajo.

Ajo thotë se janë në proces të konsolidimit të komisioneve dhe presin që së shpejti t’i adresojnë të gjitha aplikacionet dhe t’i paguajnë ato të që janë aprovuar.